Orðin svona stór

Þetta samtal áttum við átta ára heimspekingurinn heima hjá mútter um daginn.

Hún: Ætlar þú ekki að eignast börn?
Ég: Ha, ég?
Hún: Já. Hvenær ætlar þú að eignast börn?
Ég: Tja, maður ræður því kannski ekki alveg...
Hún: Þú ert alveg orðin nógu stór.

Þá veit ég það.

Andvaka

Ég vakti til rúmlega tvö í nótt til að horfa á Rockstar Supernova og þó aðallega til að kjósa Magna. Mér fannst hann standa sig vel og hann á það fyllilega skilið að halda áfram í þættinum. Ekki fannst mér síður skemmtilegt að sjá Lukas í einu af þremur neðstu sætunum í lok þáttarins. Já, svona er ég illa innrætt. Ég get ekki skilið hvað meðlimir Supernova eða aðrir sjá við hann. Lukas hefur kannski "lúkkið" en hann er ekkert sérstaklega góður söngvari og þrátt fyrir lofsyrði dómara fannst mér hann standa sig frekar illa í gær. Ég spái því að Storm detti út í kvöld, en þó er aldrei að vita hvað gerist.

Góðar fréttir

Eftir vinnu í dag fór ég til læknis til að fá niðurstöður úr blóðprufu, sem ég fór í fyrir viku. Það var eins og mig grunaði að mér er að batna heilmikið, enda er ég ekki eins hrikalega þreytt og ég var alltaf í vetur og vor. Það eina sem hefur ekki lagast er eitthvað blóðsökk, en eins og skáldið sagði: Two out of three ain't bad. Lyfin sem ég hef verið að taka í þrjá mánuði eru sem sagt að gera sitt gagn og ég þarf ekki að hitta lækninn aftur fyrr en eftir hálft ár. Ég á samt að fara í augnpróf í millitíðinni, út af einhverjum mjög sjaldgæfum aukaverkunum sem lyfið getur valdið, en það er bara til öryggis. Um daginn tók ég viðtal við konu sem er á móti öllum læknislyfjum, en fyrir mína parta vil ég frekar notfæra mér læknavísindin heldur en að vera svo lasin að ég komist ekki fram úr rúminu á morgnana.

Ein sit ég og sauma...

Þá er sambýliskona mín til skamms tíma flutt út og komin í eigin íbúð. Hún kom í dag og náði í afganginn af dótinu sínu. Nú verðum við að sjá hvort að töfraherbergið hefur gert sitt gagn. Ætli ég gefi henni ekki hálft ár til þess að finna sambýlismann. Okkur tveimur tókst alla vega að búa saman í sex vikur án þess að myrða hvor aðra, þannig að það lofar góðu. Sjálf væri ég alveg til í að kynnast einhverjum góðum manni, helst iðnaðarmanni eða að minnsta kosti einhverjum sem er handlaginn og getur tekið til hendinni heima fyrir. Hann þarf að elska hunda og ekki er verra ef hann kann að elda heilsufæði. Umsóknir óskast í kommentakerfið.

Creep

Fyrir rúmum 13 árum var ég í námi í Bandaríkjunum og einn daginn var nýtt lag, sem ég hafði aldrei heyrt áður, kynnt sem líklegt til vinsælda í útvarpinu. Tvö lög voru kynnt í einu og fólk fékk að kjósa um það hvort lagið ætti að komast inn á spilunarlista útvarpsstöðvarinnar. Mér fannst lagið Creep alveg frábært við fyrstu hlustun og skildi ekkert í liðinu sem hringdi inn til þess að greiða atkvæði með hinu laginu. Allar götur síðan hef ég haldið upp á þetta lag og hef ég hrellt ófáar diskósinnaðar vinkonur mínar með því að spila Radiohead í partýum og bílferðum. Magni fór bara ágætlega með lagið, þó að hann sé nú talinn líklegur til þess að detta út úr Rockstar þættinum hvað úr hverju.

Allt í klessu

Ég ætti kannski að hætta að vorkenna sjálfri mér, þó að það líti út fyrir að ég muni sitja uppi með baðvaskinn, baðkarið og innréttingarnar í stofunni næstu vikuna, ef ekki vikurnar. Ég fæ nefnilega ekki flísalagningamann fyrr en það rignir. En systir lenti heldur betur illa í því þegar hún flutti úr einni vík í aðra. Flutningabílinn fór nefnilega út af veginum og stór hluti af búslóðinni skemmdist. Þar á meðal var víst nýlegt borðstofuborð, stofuborð, stofuskápur, ísskápur, glænýr sófi og fleira. Leirtauið er líka meira og minna brotið, miðað við fréttir sem ég fékk að austan. Lærdómur þessarar viku: Það er hættulegt að leggjast í framkvæmdir á heimilinu, en það er ennþá hættulegra að flytja!

Vont en það versnar

Íbúðin mín verður sífellt skrautlegri. Nú eru allir baðskáparnir og vaskurinn inni í stofu, baðkarinu til samlætis. En á móti kemur að smiðurinn er búinn að klæða klósettkassann og undirbúa allt fyrir flísalagningu. Ef ég verð heppin verður baðherbergið tilbúið fyrir mánaðamót. Í versta falli ætti allt að verða búið fyrir áramót. Forstöðumaðurinn á að fá íbúðina sína afhenta nú um helgina og hún verður eflaust fegin að losna úr þessu kaosi hér. Ég ákvað að miðla af reynslu minni og sagði henni því að láta sér þykja vænt um innréttingarnar í nýju íbúðinni. Ekki fara út í framkvæmdir heima fyrir, börnin góð! Þið vitið aldrei hvar þær enda.

Heimapróf

Ég er í heimaprófi í lögfræði í dag. Ballið byrjar kl. níu og samkvæmt reglum verð ég að ljúka prófinu fyrir kl. 17. Ég sit hér tilbúin með bækur um stjórnsýslulög, upplýsingalög og fleira skemmtilegt við hliðina á tölvunni. Í dag erum við líka að loka blaðinu, þannig að ég er að reyna að klára sem mest fyrir kl. níu. Í þokkabót er nú kominn múrari heim til mín til þess að vinna í baðherberginu. Allt að gerast í einu, sem sagt. Blóm eru vinsamlega afþökkuð, en þeim sem vildu minnast mín er bent á minningarsjóð óþekk(t)a háskólanemans.

Trúlofun

Um helgina varð merkisviðburður hjá fallegustu fjölskyldu í heimi, þar sem sálfræðineminn og kórdrengurinn trúlofuðu sig. Ég fékk tíðindin á endanum með myndskilaboðum, þar sem sáust tvær hendur með hringa. Mér skilst að stóri dagurinn eigi að verða innan árs. Ég efast um að ég eigi eftir að kaupa mér dragt, eins og ég gerði þegar systir gifti sig fyrir níu árum. Ekki af því að mér finnist þetta ekki jafn merkilegt brúðkaup, heldur vegna þess að mér finnst ekki lengur nauðsynlegt að klæðast drögtum í brúðkaupi. Innilega til hamingju, Telma og Kalli!

Tveir karlar á sextugsaldri

Þá eru Framsóknarmenn búnir að kjósa sér forystu og kom fátt á óvart þar. Reyndar voru einhverjir í kringum mig sem spáðu Siv sigri, en ég var alltaf viss um að Jón Sigurðsson yrði formaður og sömuleiðis að Guðni yrði áfram varaformaður. Ekki vegna þess að Jón hafi verið frambærilegri en Siv, eða Guðni betri kostur en Jónína, heldur vegna þess að það voru auðvitað Framsóknarmenn sem kusu og oftast má treysta þeim til þess að taka rangar ákvarðanir. Jón kom mjög furðulega fyrir í Kastljósinu í vikunni og tönnlaðist á því að Framsóknarmenn væru fulltrúar þjóðhyggju, hvað sem það annars er. Er það einhver ný útgáfa af þjóðernishyggju? Jón virðist hafa verið frambjóðandi Sjálfstæðismanna í þessu kjöri og því hljóta þeir að kætast í dag. Alla vega vænti ég þess að Styrmir haldi partý, miðað við skrif hans í Morgunblaðið undanfarna daga og vikur.

You have killed me

Nágrannarnir eru að spila Morrisey, svo að ég varð náttúrulega að setja nýja diskinn hans sem ég keypti í gærkvöldi í græjurnar þeim til samlætis. Það var hrikalega gaman á tónleikunum í gær og þeir voru svo sannarlega hverrar krónu virði. Upphitunaratriðið var reyndar nærri búið að drepa mig í leiðindum, en þegar meistarinn steig á svið og söng mörg af sínum bestu lögum var það fyrirgefið. Heilu árgangarnir af MH-ingum voru mættir í Laugardalshöllina og allir virtust skemmta sér vel. Eftir tónleikana fórum við heim til fröken Kennedy og við enduðum með því að fara á Thorvaldsen. Ég get svo svarið að það var varla einn einasti myndarlegur karlmaður á staðnum. Ætli þeir hafi allir verið á Gay pride ballinu á Nasa?

Frá vöggu til grafar

Í dag var vígður kirkjugarður í mínum ástkæra heimabæ. Nú getum við Kópavogsbúar látið grafa okkur í túninu heima, sem hlýtur að vera öllum innfæddum mikið ánægjuefni. Mér létti alla vega við að vita það að mér yrði ekki holað niður í framtíðinni einhvers staðar í Grafarvoginum. Það er gott að búa í Kópavogi, hvort sem það er hérna megin grafar eða hinum megin. Ég er að hugsa um að panta mér fallegan reit með útsýni yfir Salahverfið.

Sveitin

Við voffilíus fórum í heimsókn í sveitina um helgina. Fyrst fórum við í Mýrdalinn og skoðuðum hús nokkuð í Vík. Síðan fórum við í sumarhöllina, þar sem hann skemmti sér við að gelta á hesta og ég veiddi risasnigla. Mútter grunaði að þarna væri kominn spánarsnigillinn ógurlegi, sem væri búinn að nema land hjá okkur, en eftir samanburð við myndir úr fjölmiðlum sýnist mér að við séum bara með vel alda, brúna brekkusnigla. Annars gæti ég alveg hugsað mér að fá einhverja skaðræðisskepnu til þess að éta allt grasið á sumarlandinu, því það er mikið vesen að slá það. Á meðan hún étur ekki trén eða runnana er ég sátt.

Ferðahelgi

Ég fór í fýlu í morgun, þegar ég var vakin með símtali sem tengdist vinnunni. Annars hef ég ekki farið neitt um þessa mestu ferðahelgi ársins. Veðrið er ekki beinlínis freistandi. Við voffilíus erum þó enn að velta því fyrir okkur hvort að við eigum að fara í sumarbústað á morgun. Ég þarf að vinna á mánudaginn, þannig að það yrði bara stutt heimsókn. Kannski keyrum við bara austur í Vík og sjáum nýja húsið sem systir og fjölskylda ætla að flytja í á næstunni. Það gæti verið gaman.

Umbætur

Mikið hrikalega er leiðinlegt að standa í framkvæmdum á heimilinu. Nú er loksins komið nýtt klósett í baðherbergið, en baðkarið er ennþá í stofunni. Hér eru dagblöð á gólfinu og steypuryk alls staðar. Svo á eftir að flísaleggja baðið, setja upp handklæðaofn og fleira. Ég hlakka ekkert smá til þegar þetta verður allt búið. Held að ég geri ekkert meira hér heima í bili. Eldhúsið er samt á framkvæmdalista framtíðarinnar, sem og pallur í garðinn og ný gólfefni á herbergin.