Career opportunities

Nýafstaðnar kosningar þýða að störf bæjar- og sveitarstjóra í hinum ýmsu sveitarfélögum liggja á lausu. Ég þekki þrjá einstaklinga, tvær konur og einn karlmann, sem létu sig hafa það fyrir fjórum árum að flytja út á land og stjórna þrotabúi einhvers sveitarfélags. Undanfarið hafa störf bæjarstjóra Fjallabyggðar (hvar sem það er), Fjarðabyggðar og Bolungarvík verið auglýst. Einnig vantar sveitarstjóra í Skeiða- og Gnúpverjahrepp, Hvalfjarðarsveit og Húnavatnshrepp. Ég á nú ættingja bæði á Bolungarvík og í Húnavatnshrepp, auk þess sem familían á sumarbústað fyrir austan. Það versta við að vera bæjarstjóri úti á landi er samt að maður þarf að búa úti á landi. Ég er ekki viss um að ég sé tilbúin til þess.

Baðherbergisraunir

Það er stórt, hvítt fyrirbæri í stofunni hjá mér. Ekki þó hvítur fíll, heldur stórt, hvítt baðkar. Ég reif sturtuna fyrir tveimur mánuðum og hef síðan verið að dunda mér við að rífa flísar af veggjunum og elta uppi iðnaðarmenn. Um daginn náði ég loksins í múrara með aðstoð fröken Kennedy og vinnuvinkonu hennar. Hann gaf grænt ljós á frekari framkvæmdir, þannig að ég dreif mig og keypti karið. Ég ákvað að gera þetta almennilega og keypti flott nuddbaðkar af bestu gerð. Þar á undan var ég búin að kaupa nýtt vegghengt salerni, handklæðaofn og flísar. En nú næ ég ekki í smiðinn og píparinn er að fara í sumarfrí. Þannig að ég sit uppi með baðherbergi í rúst og íbúð fulla af hreinlætistækjum. Ég býð engum heim á næstunni, það er alveg ljóst.

Sorg

Þær sorgarfréttir hafa borist að Moose, sá sem lék Eddie í gamanþáttunum um Frasier, sé látinn aðeins sextán ára að aldri. Moose fæddist í Florida og var einn af tíu systkinum. Auk þess að leika í Frasier þáttunum í áratug lék Moose einnig í kvikmyndum og sjónvarpsauglýsingum. Hann komst á forsíður tímarita og á hans yngri árum var gefið út dagatal prýtt myndum af honum. Við Dagur sendum fjölskyldu hans og aðdáendum samúðarkveðjur.

Verðlaunin

Þá eru úrslitin ljós. Ármann var lesandi nr. 50.000 hér á blogginu og fær því vegleg verðlaun. Ibba Sig., sem var gestur nr. 10.000 var eitthvað að kvarta yfir sínum verðlaunum, en hún fékk að koma með mér í Sporthúsið á sínum tíma. Ég veit þess vegna ekki hvort að ég þori að bjóða dr. Ármanni í ræktina. Kannski ætti ég frekar að gefa honum ljósakortið mitt, sem ég má ekki lengur nota, svo að hann geti orðið elgtanaður og fínn í sumar. Ég gæti tileinkað Ármanni ljóð, en þar sem hann er íslenskufræðingur og bókmenntagagnrýnandi að auki, er hann vís til að tæta það í sig. Þannig að ég held að ég spili bara lag honum til heiðurs hér á síðunni. Lagið má finna hér.

50.000

Nú fer þetta að gerast. Koma svo! Vegleg verðlaun í boði (eða þannig).

Til hamingju

Í dag útskrifar Kennaraháskólinn nýja kennara og það þýðir að kennaraneminn er orðinn útlærður kennari. Hún ætlar þó ekki að fara að uppfræða ungdóminn strax, heldur er stefnan tekin á meistaranám í haust. Innilega til hamingju frú Kitta! Þinn tími er kominn.

Áfangar

Þann 23. júní 2004 sat ég úti í Glasgow og ákvað að prófa að blogga. Bloggið mitt verður sem sagt tveggja ára á morgun. Alveg er það merkilegt að maður skuli nenna þessu. Enn merkilegra er að einhver skuli kíkja hingað á síðuna til að lesa misgáfulega pistla um líf mitt. En það er samt staðreynd. Sennilega hefur fólk ekkert betra að gera. Teljarinn á síðunni nálgast nú 50 þúsund, sem er alveg stórmerkileg tala. Lesandi nr. 50.000 fær "vegleg" verðlaun, ef hann eða hún tilkynnir sig í kommentakerfinu hér að neðan.

Moggafjólur

Stundum grunar mig að geimverur sjái um skrifin á mbl.is.

"Milljónamæringum í heiminum fjölgar

Fjöldi milljónamæringa í Bandaríkjadölum talið í heiminum hækkaði í 8,7 milljónir á síðasta ári. Skyndileg aukning í nýjum mörkuðum líkt og í Suður-Kóreu, Indlandi og Rússlandi er sögð hafa áhrif á þróunina og fjölgað auðæfingum. En þetta kom fram í nýrri könnun sem var birt í dag."

Útrýming

Systir og fjölskylda eru komin til Danmerkur, þar sem sumarið býr. Seinna í dag er meindýraeyðirinn væntanlegur heim til mín. Við voffilíus flytjum í nokkra daga til mútter, sem er á ferðalagi um Suðursveit. Engin nettenging er heima hjá henni, þannig að ég verð að mestu sambandslaus við umheiminn þangað til ég flyt aftur heim í íbúðina, sem verður þá vonandi bjöllulaus.

Málum bæinn bleikan!

Í dag er 91 ár liðið síðan íslenskar konur hlutu kosningarétt. Af því tilefni er haldið upp á dag kvenréttinda um allt land og er fólk meðal annars hvatt til þess að bera eitthvað bleikt allan daginn. Ég sit hér í bleiku peysunni minni, sem familíunni finnst svo ljót, og er að hugsa um að kaupa bleik sumarblóm á eftir.

Dagskrá dagsins er svona:

15:30 Dularfullt hvarf kvenna úr vísindum – hvert hafa allar ungu konurnar farið? Fyrirlestur Önju Andersen stjarneðlisfræðings í Hátíðarsal Aðalbyggingu HÍ.

16:45 Safnast saman í Aðalbyggingu HÍ, þar sem verður boðið upp á hressingu fyrir göngu.

17:00 Gengið af stað í Kvosina undir leiðsögn Kristínar Ástgeirsdóttur í boði Kvennasögusafns Íslands.

18:00 Veitingar og hressandi dagskrá á Hallveigarstöðum í boði Kvenréttindafélags Íslands, Kvenfélagasambandsins og Bandalags kvenna í Reykjavík.

20:30 Kvennamessa Kvennakirkjunnar í samvinnu við Kvenréttindafélag Íslands og Kvenfélagasamband Íslands. Messan er við þvottalaugarnar í Laugardal.

20:00 Bleikir tónleikar Ungliðahóps Femínistafélagsins á Barnum, Laugavegi 22.

Þjóðhátíð

Ég fagnaði þjóðhátíðardeginum í gær aðallega með því að borða með familíunni. Við byrjuðum með síðdegiskaffi, þar sem snædd var göfug súkkulaðiterta með bananakremi ásamt alls konar öðru bakkelsi. Eftir kaffið var smá hvíld fram að kvöldverði, sem var lamb með hefðbundnu meðlæti. Auðvitað var eftirréttur og eftir hann lagðist liðið á meltuna. Sjónvarpsstöðvarnar gerðu heiðarlega tilraun til að drepa okkur úr leiðindum með þriðja flokks bíómyndum. Sennilega hafa dagskrárstjórar stöðvanna gert ráð fyrir að allir væru niðri í bæ og því væri kominn tími til að draga fram útsöluruslið.

Myndir

Ef veðrið væri nú svona hér heima á Íslandi. En það rignir bara og rignir. Systir er í bænum með familíuna. Þau eru á leið til Danmerkur í næstu viku, en þar er víst sól og gott veður. Ég er byrjuð að setja inn myndirnar frá Boston á myndasíðuna mína og þar á eftir koma einhverjar myndir frá ættarmótinu.

Með sól í sinni

Ég var búin að ákveða að koma litla garðinum mínum í stand fyrir 17. júní. Kaupa sumarblóm, hreinsa grillið og uppræta fíflana sem hafa troðið sér á stéttina. En þá rignir auðvitað dag eftir dag, svo að ég nenni ómögulega að vera utandyra. Voffilíus er á sama máli. Hann rétt kíkir út til að sjá hvort að veðrið hafi skánað og hleypur svo strax inn aftur. Veðurspáin lofar ekki góðu fyrr en á sunnudag, svo að það er spurning hvort að ég geri eitthvað fyrir þjóðhátíðardaginn eða hvort að ég læt allt danka þar til veðrið er orðið skaplegt.

Pöddulíf

Fljótlega eftir að ég kom heim frá útlandinu og ættarmótinu tók ég eftir óboðnum gestum, sem höfðu gert sig heimankomna í íbúð okkar voffilíusar í fjarveru okkar. Þetta eru litlar, brúnar bjöllur, sem halda sig helst í eldhúsinu. Ég reyndi eins og ég gat að sótthreinsa eldhúsið í veikindum mínum, auk þess sem ég henti öllum opnum pökkum með pasta, mjöli og öðru kornmeti. En allt kom fyrir ekki. Litlu boðflennurnar koma alltaf aftur. Eftir leit á veraldarvefnum giska ég helst á að þetta séu hambjöllur, sem hafa lagt undir sig eldhúsið mitt. Á morgun verð ég víst að kalla á meindýraeyði og freista þess að binda enda á bjöllupartíið. Vonandi ber það árangur.

Lasarus

Undanfarnir dagar hafa ekki verið mjög skemmtilegir hjá mér og mínum. Við mútter og litla frænka fengum magapest dauðans, sem er ekki enn gengin yfir. Mér finnst óþarfi að hrella lesendur með miklum smáatriðum. Ætli það nægi ekki að segja að þessi pest líkist Framsóknarflokknum. Hún er sem sagt opin í báða enda. Vonandi erum við dömurnar þó ekki á grafarbakkanum, eins og sá flokkur virðist vera þessa dagana.

06.06.06

Við Kennedy systur fórum á Bubba tónleikana í kvöld og skemmtum okkur vel. Tónleikar með Bubba eru sérstakir að því leyti að heitustu aðdáendurnir eru ekki ungar stúlkur, heldur miðaldra karlmenn sem standa fremst og syngja með goðinu sínu. Nokkrir gestasöngvarar komu fram og var Hera langbest, þó að Ragga Gísla stæði sig líka vel þegar hún söng um lögreglukórinn. Bubbi var sjálfum sér líkur og var í hörkustuði í þrjá tíma samfleytt. Hann má eiga það að hann er í ótrúlega góðu formi, orðinn fimmtugur og ennþá að. Fyrir minn smekk voru síðustu lög tónleikanna þau bestu, þegar Bubbi tók lagið með Utangarðsmönnum og Egó. Those were the days.

Heima er best

Þá erum við voffilíus komin aftur heim í íbúðina okkar, eftir ferðalög innanlands og utan. Vélin frá Boston lenti snemma á laugardagsmorguninn og ég fór beint norður í land á ættarmót ásamt mútter, voffilíusi og fótboltabörnunum. Við skemmtum okkur ágætlega í Skagafirði og fórum meðal annars á Hóla, þar sem faðir minn stundaði nám á sínum tíma. Annars voru helstu afrek Bostonferðarinnar þessi: Ein heimsókn í sædýrasafn, ótal gönguferðir um borgina, tvær heimsóknir í listasöfn, gönguferð um Harvard, bátsferð um höfnina, ein bíóferð og ein ferð í verslunarmiðstöð. Auk þess tók ég góðan slatta af myndum, sem ég á eftir að setja inn á myndasíðuna mína.