Uppskeran

Eins og Tóta pönk varð ég fyrir smá vonbrigðum með jólakortauppskeruna. Ég sendi yfir 20 jólakort en uppskar innan við 10 kort til baka. Held að ég hafi ekki fengið færri jólakort síðan ég flutti heim frá Bandaríkjunum fyrir um áratug. Meira að segja flokkurinn og þingmennirnir, sem alltaf hafa sent mér kort, sendu mér ekkert þessi jólin. Kannski er kominn tími til að skipta um flokk, fyrst að hann nennir ekki einu sinni að senda manni jólakort lengur. Mig grunar reyndar að einhverjir hafi farið í þjóðskrá og sent kortin á lögheimilið mitt. En ég fékk þó þokkalega uppskeru í jólapakkadeildinni, miðað við aldur og fjölskyldustærð.

Þetta fékk ég í jólagjöf:

Bókina Íslendingar
Bókina Arabíukonur, áritaða af höfundi
Bók um gæludýr
Jóladiskinn með systrunum þremur (honum verður skipt)
Tvo konfektkassa (við erum langt komin með annan þeirra)
Light blue ilmgel frá Dolce & Gabbana
Náttbuxur, bleika sokka og hárskraut (enginn jólaköttur á mínu heimili)
Lord of the Rings I og II, special edition á DVD
Lampa
Parket

Heimsfrægðin

Ég varð næstum því fræg í útlöndum á Þorláksmessu. Í stað þess að éta úldinn fisk eins og margir landar mínir gera á þeim degi, stóð ég um hádegisbilið í biðröð á breskum flugvelli. Ég reyndi að stytta mér stundir með því að lesa slúðurblað, en Bretar eru flestum þjóðum fremri í framleiðslu slíkra rita. Allt í einu ávarpaði mig einhver maður og þegar ég leit upp var sjónvarpsmyndavél og kastljósi beint að mér. Maðurinn sem hafði talað beindi að mér hljóðnema og sagðist vera að gera frétt um Breta sem færu úr landi um jólin. Fréttamaðurinn var ekki frá neinni lókal stöð, heldur frá sjálfu BBC. Það hvarflaði að mér snöggvast að búa til einhverja sögu, en því miður er ég með allt of amerískan hreim á enskunni til að vera sannfærandi Breti. Ég varð því að hryggja hann og viðurkenna að ég væri ekki bresk og að ég væri bara að fara heim. Þar með var heimsfrægðin runnin mér úr greipum, alla vega í bili.

Jólakortin

Ég fór með jólakortin í póst rétt fyrir lokun í Smáralindinni í kvöld. Hitti bæjarfulltrúann, sem var líka að setja sín kort í póst. Systir er komin í heimsókn með familíuna, svo að drengurinn kom með mér í musterið. Við hliðina á pósthúsröðinni var hljómsveitin í Svörtum fötum að árita, svo við slógum tvær flugur í einni musterisferð. Ég póstlagði kortin og hann fékk tvær myndir áritaðar af Jónsa og félögum fyrir sig og litlu dömuna. Þó ég hafi sent löggiltan fjölda af kortum er ég ekki viss um að ég fái nein jólakort í ár. Ég bý nefnilega á einum stað en er með lögheimilið skráð á öðrum. Í ofanálag er ég ekki skráð fyrir neinum síma. Því er viss hætta á að kortin rati ekki á réttan stað. Alla vega er ég ekki búin að fá eitt einasta jólakort ennþá. Ég vil frekar trúa því að fólk hafi ekki fundið heimilisfangið, en því að allir séu búnir að gleyma mér.

Pakka, pakka

Ég er búin að fá jólapakka! Fékk fyrstu jólagjöfina í vinnunni í dag, vegna þess að ég er að fara til útlanda og þetta er því síðasti vinnudagurinn minn fyrir jól. Ef að þið haldið að ég bíði til jóla með að opna pakkann, þá þekkið þið mig ekki neitt. Á mínu heimili eru jólakortin líka opnuð um leið og þau detta inn um lúguna og í þeim efnum er mútter ekkert betri en ég. Systir veit þetta vel. Hún sendi mér afmælisgjöfina snemma í ár, enda ekki alltaf hægt að treysta á hraðann hjá Íslandspósti. Ég opnaði gjöfina frá henni auðvitað um leið og hún kom, en ákvað að minnast ekkert á það við hana svo að hún vissi ekki að ég hefði tekið forskot á sæluna. En auðvitað vissi hún það samt. Hún þekkir sitt heimafólk. Ég ætla samt að bíða með að taka upp jólagjöfina þar til ég fer heim kl. fimm í dag, svo að vinnufélagar mínir sjái ekki hversu forvitin ég er.

Jólaklippingin

Þá er það opinbert. Ég hata nýju klippinguna mína og ég hata háralitinn enn meira. Ég fór sem sagt í klippingu og litun á fimmtudaginn. Það er alveg sama hversu mikið ég hef reynt að leika Pollýönnuleikinn. Þetta er einfaldlega ljótt. Hárið er of stutt og of dökkt. Ég fór í brúðkaup kennaranemans í gær og fílaði mig eins og miðaldra kerlingu með þessa fáránlegu hárgreiðslu. Það er ekki nóg með að ég hafi neyðst til að fara í brúðkaupsveisluna svona útlítandi, heldur fór ég á jólaskemmtun líka og í næstu viku þarf ég að ferðast á milli landa með húfu á hausnum. Ég ætla að láta mér þetta að kenningu verða og fara aldrei í klippingu framar. Ef þið mætið einhvern tímann í framtíðinni konu úti á götu með hár niður á tær, þá verður það ég.

Bókaflóðið

Fyrir mig er það að komast inn í bókabúð eflaust svipuð tilfinning og þegar vampíra kemst inn í blóðbankann. Allt fullt af girnilegu efni. Næstum undantekningarlaust fer ég út með eitthvað í poka, þó að það sé ekki nema tímarit. Stundum kaupi ég ljóðabók eða skáldsögu. Þess vegna leyfi ég mér sjaldan að fara inn í slíkar verslanir. En nú er mér hvergi undankomu auðið. Bækur blasa við í stórmörkuðunum, meira að segja í Bónus. Mig langar í svo margar af jólabókunum. Til dæmis Rigningu í nóvember eftir Auði frænku, Fólkið í kjallaranum eftir Auði Jóns, Arabíukonur eftir Jóhönnu Kristjóns, nýju bókina um Halldór Laxness eftir nafna hans (ekki Hólmstein) og svo mætti lengi telja. Mig langar líka að lesa nýju bókina eftir Gerði Kristnýju, þó að ég hafi orðið fyrir vonbrigðum með síðustu sögu hennar. Svo verð ég auðvitað að lesa Kleifarvatn, hvort sem að það verður núna eða þegar hún kemur út í kilju. En þar sem mér skilst að mútter og systir ætli aðallega að gefa andlegar gjafir þessi jólin, reikna ég með því að þurfa að kaupa bækurnar sjálf, ef ég ætla að fá einhverjar.

Jólagjafirnar

Ég er búin að kaupa allar jólagjafirnar sem ég ætla að kaupa, enda er fjölskyldan ekki mjög stór. Reyndar byrjaði ég að kaupa gjafirnar í október, þegar ég fór til Bretlandseyja að hitta leiðbeinandann minn út af ritgerðinni. Eina jólagjöf keypti ég um leið og ég fór í klippingu í nóvember. Rakst á flotta búð rétt hjá hárgreiðslustofunni og fann þar heppilega gjöf. Svo keypti ég síðustu gjöfina í Smáralindinni um helgina. Þannig að ég slepp við allt jólastress og ráp á milli verslana síðustu vikuna fyrir jól. Svona á þetta að vera.

Namm, appelsínur

My angst tastes like...


Orange
Sweet and citrus, your angst comes from your social life.Perhaps you're accustomed to having lots of friends around and yet currently you're feeling lonely. Perhaps you hang out with a bunch of difficult people that really wear you down. Perhaps you're worried about your friends' loyalties and motives. Perhaps you're realizing that your life is too busy and too many people want your attention. Just take a couple steps back, a few deep breaths, and a quick self-inventory and think about how you really ought to live your life and treat others. Don't worry, it'll clear up soon.

Find your angst's flavor

Tilhlökkun

Ég hef fengið það staðfest að ég fæ íbúðina mína loksins afhenta um áramótin. Þannig að í janúar flyt ég úr kóngulóarhöllinni í litla kjallaraíbúð. Íbúðin mín verður ekki með sérhönnuðum innréttingum eða húsgögnum úr Casa og hún kemst sennilega seint í Innlit-útlit. En mér er sama því að hún er mín. Já, og svo eiga íbúðalánasjóður og aðrar lánastofnanir víst sinn hlut í íbúðinni eins og gerist. Ég er með þá áráttu að vilja breyta og bæta þar sem ég kem mér fyrir, svo það verður sennilega erfiðast fyrir mig að halda aftur af mér í þeim efnum. Hvernig er það, þekkir einhver myndarlega unga iðnaðarmenn á lausu?

Skólalok

Síðasta kennslustundin í forstjóranáminu á þessari önn er yfirstaðin. Að vísu á ég eftir að skila einu verkefni á föstudaginn, og svo mastersritgerðinni á Þorláksmessu, en eftir það verð ég í skólafríi fram í miðjan janúar. Jólafríið mitt verður nákvæmlega þrír dagar, en það verður samt enginn smá lúxus að vera "bara" að vinna og þurfa ekkert að hugsa um skólanám í heilar þrjár vikur.

Tölvuvesen

Tölvan mín tók upp á því að hrynja fyrir helgina. Ég ætlaði að vera ógurlega sniðug og setja inn nýtt vírusvarnarforrit en það varð til þess að tölvan neitaði að kveikja á sér aftur. Ég skundaði með tölvuna niður í Apple umboðið og þar var fyrir viðskiptavinur sem átti við nákvæmlega sama vandamál að stríða. Hann hafði verið að setja inn sama vírusvarnarforritið og ég. Reyndar var þetta afar myndarlegur karlkyns viðskiptavinur, en því miður full ungur fyrir mig. Viðgerðarmaðurinn kom tölvunni í gang aftur en hún er enn ekki almennilega í lagi. Ég má alls ekki missa tölvuna í miðjum ritgerðarsmíðum og því vona ég að hún lafi fram yfir jól án frekari viðgerða.

Piparmeyjan

Er ég algjör plebbi ef ég hef lúmskt gaman af Bachelorette þáttunum sem sýndir eru á Skjá einum? Er þetta ekki í rauninni háalvarlegt, póstmódernískt sjónvarpsefni? Eða þá beitt ádeila á neyslusamfélagið þar sem allt er til sölu, líka hjónabandið? Kannski hef ég bara gaman af því að sjá stelpu velja úr hópi af karlmönnum og kyssa þá flesta á endanum. Hvað sem því líður, þá er þetta þrælskemmtilegur þáttur.

Merki

Mér hafa áskotnast afar glæsileg rauð merki, sem á stendur: "Ég er afturhaldskommatittur". Þökk sé hugskotinu, sem sendi mér þau. Merkin eru algjör snilld. Ég festi eitt þeirra á úlpuna mína og fór í henni í skólann í dag. Það er ákveðinn húmor fólginn í því að bera svona merki í kapítalistaskólanum. Ég fékk reyndar þrjú merki og eitt þeirra fer til ungfrú Danmerkur, en hinu þriðja er enn óráðstafað.

Jóla hvað?

What a marvelous person! You are the splendid
Christmas tree! You are a spirited person who
almost always in a great mood. Your smiles and
laughter are some things that people usually
look forward to in you. You are someone who is
full of energy and ready for a good time. Most
likely you are a social butterfly. All of these
characteristics make you a beautiful person
inside and out. People just really enjoy to be
around you. Merry Christmas =)


What Christmas Figure Are You?
brought to you by Quizilla

Lögregluhundurinn

Það gerðist reyndar nokkuð fyndið á tónleikunum í Smáranum um helgina. Við biðum í anddyrinu eftir því að ungfrú Rockefeller kæmi, en hún var að leggja bílnum. Ég sá hund inni á gangi og hugsaði "Sætur voffi." Var næstum því farin til að klappa honum, þar sem ég elska hunda. En þá sá ég manneskjuna sem hélt í hundaólina og viðkomandi var merkt "Tollgæslan" í bak og fyrir. Þetta var sem sagt hasshundur. Hundurinn þefaði heillengi af mér og ungfrú Rockefeller, eftir að við komum inn. Ég veit ekki hvort að það var Gucci-ilmvatnið hennar eða nuddolíurnar frá Saga Spa sem gerðu okkur svona grunsamlegar. Ráðskonan lenti þó í mesta hasarnum, því að hann var beðinn um að koma fram af óeinkennisklæddum lögregluþjóni til að gangast undir hassleit. Auðvitað fannst ekkert. Morgunblaðið segir í dag að farið sé með leitarhunda á tónleika "þegar líkur eru á að fíkniefni séu höfð um hönd." Hvað segir það okkur um fordóma lögreglunnar? Eru miðaldra unnendur pönktónlistar líklegri til þess að nota fíkniefni en miðaldra unnendur klassískrar tónlistar? Eða megum við eiga von á leitarhundinum á næstu kirkjutónleikum eða í óperunni?

Stjörnumerki

Ég hef ekki mikla trú á stjörnumerkjum, en þetta er þó skuggalega nærri lagi:

You are 73% Sagittarius

How much do you match your zodiac sign?

No more heroes

Ég fór sem sagt á Stranglers tónleikana í gærkvöldi. Fór með ungfrú Rockefeller, ráðskonunni, fyrrverandi ungfrú Danmörku, skrifstofustjóranum og frænku hennar. Við mættum tímanlega og hlustuðum á Fræbbblana spila. Svei mér þá ef Fræbbblarnir voru ekki betri en þeir voru þegar ég heyrði í þeim síðast. Alla vega var hljóðfæraleikurinn þéttur og góður, en ég skildi varla orð sem Valli sagði frekar en fyrri daginn. Af einhverjum ástæðum voru karlmenn 80-90% tónleikagesta. Kannski að þetta sé meira strákatónlist. Við létum það ekki á okkur fá og skemmtum okkur vel. Stranglers komu á svið og tóku gamla slagara í bland við nýrri lög. Mér fannst þeir skila þessu vel, þó að ráðskonunni fyndist þeir ekki alveg nógu kraftmiklir. Ungfrú Danmörk lét hinn "nýja" söngvara Stranglers fara í taugarnar á sér, þar sem hann var sólbrúnn, vöðvastæltur og með aflitað hár. Ekki beint í gamla pönkstílnum, sem gekk meira út á að vera horaður og hvítur. Ég lét þetta ekki pirra mig, enda var ég enn í Zen-búddista fílingnum eftir nuddið fyrr um daginn. Maðurinn söng vel, hann var í góðu formi og hann fór úr að ofan. Hvers getur kona óskað sér frekar?

Sæla

Ég var í nuddi áðan. Hvílík sæla. Þetta er í annað skipti sem ég fer í nudd í vetur. Ef ég hefði efni á því, færi ég í nudd í hverri viku. Þau kunna að gera þetta í Saga Spa. Eru með rólega tónlist, dimmer á ljósunum og kerti, svo að slökunin verður algjör. Ég þarf svo mikið á einhverju svona að halda, þar sem ég er alltaf að gera svo mikið og kann ekki að slaka á. Kannski er eitthvað vit í þessum Zen-búddisma eftir allt saman. Alla vega er alveg nauðsynlegt að taka því rólega stundum. Tilefnið var afmæli fröken Hafnarfjarðar, en við gáfum henni nudd og andlitsbað í afmælisgjöf. Svo vorum við svo lengi í pottunum að við vorum orðnar soðnar eins og rúsínur. Ræddum öll okkar vandamál og hefðum getað leyst heimsmálin líka, eins yfirvegaðar og rólegar og við vorum.

Stranglers

Ég tók mig til í vikunni og keypti miða á Stranglers tónleikana annað kvöld. Nokkrar vinkonur mínar eru að fara og fyrst ætlaði ég ekki að slást í hópinn, út af ritgerðinni. Mig langaði samt að fara og hlusta á hljómsveitina, enda hef ég lengi haft gaman af tónlist hennar. Ég fór ekki á Stranglers tónleikana þegar þeir komu hingað 1978, þar sem ég var of lítil. En nú halda mér engin bönd. Fræbblarnir hita upp og það verður líka gaman að heyra í þeim aftur. Í staðinn verð ég að leggja enn meira á mig í lærdómnum í næstu viku, en ég held að þetta verði alveg þess virði.

Spenna

Atkvæðagreiðslu um nýjasta kennarasamninginn er nú lokið. Það er spurning hvernig fór. Einhvern veginn hef ég á tilfinningunni að samningurinn verði felldur. Þó er aldrei að vita, þar sem ég þekki mest aðra afturhaldskommatitti og hef því varla mjög marktækt úrtak í höndunum. Þorir einhver að spá um úrslitin?

Játning

Ég játa. Mér finnst ekki skynsamlegt að drepa fólk til að "frelsa" það. Ég sé ekki snilldina í því að pynta stríðsfanga. Það er ekki nóg að nefna "hryðjuverk" eða Bush til þess að ég segi já og amen. Get ekki sagt að ég dáist að gáfum Halldórs. Mér finnst Davíð vera búinn að missa það. Ég brest ekki í grát í hvert sinn sem ég heyri að herinn sé að fara. Er ekki áskrifandi að Mogganum. Hins vegar les ég Fréttablaðið daglega. Það kemur fyrir að ég kaupi inn í Bónus. Ég stend ekki á bak við eldavélina. Er heldur ekki skráð í Þjóðkirkjuna. Borða aldrei pulsur. Gísli Marteinn er ekki uppáhalds sjónvarpsmaðurinn minn. Mig dreymir ekki um Björn Bjarna. Því síður langar mig í bók eftir Hannes Hólmstein í jólagjöf. Það er kennari í fjölskyldunni. Já, það er greinilegt. Ég er afturhaldskommatittur. Gleðilegan fullveldisdag.

Lag desembermánaðar

Nú er kominn desember og aðventa, sem þýðir að ég verð að hætta að tuða yfir ótímabærum jólaskreytingum og jólalögum. Þó er ég alls ekki komin í neitt jólaskap. Reikna ekki með því að það komi fyrr en eftir að ég skila mastersritgerðinni minni rétt fyrir jólin. Einhvern tímann ætlaði ég að hafa lag vikunnar á þessu bloggi, en það varð lítið úr því. Hér er í staðinn kynnt til sögunnar lag sem á það vel skilið að fá titilinn lag mánaðarins, enda eru fá lög sem ná raunverulegri jólastemmingu samtímans betur en þetta. Fáum okkur ögn meiri rjóma.